CARNALUVARI - POESIA DI MATTEO PAVIGLIANITI

CARNALUVARI ( Lirica ricordo di Matteo Paviglianiti tratta da " 'U Specchiu D'a Vita " )

Undi si carnaluvari
cu ddha festa i brascioluni,
ddhi testazzi, ddhi crapari
e ddhi rossi purpettuni ?...

Undi su' chiddhi sirati
di mangiati allecri allecri,
'a rruttura di pignati
chi di rrisi tu mi crepi ?

Quandu tutti 'i signurini
ndi facivunu sbaffati :
cicculati 'i chiddhi fini,
e vidivi li rranfati....

Passà 'u tempu quandu nc'era
peri peri l'allicria,
quandu l'anima sincera
'a truvavi pi la via....

Era 'u tempu i minnifricu,
chin'i sordi li sacchetti,
era allecri lu mindicu,
nc'era 'u beni cu' carretti...

Si spindiva, si mangiava...
ddhi tiani di pruppetti !
E lu cori si scialava
cu' ddhi durci ffetti ffetti...

A la sira chi prufumu
di caprettu e di bracioli :
'na buttigghia 'i vinu ll'unu
supr'a quattru rravioli...

Ddhi trufei di carretti
chini chini 'i mascarati,
cu' pipiti e cu' trumbetti
e cunfetti a sassulati...

D'i barcuni, a li figghioli,
quantu pugna di turnisi,
chi di tanti caprioli
ti pisciavi di li rrisi...

E virivi peri peri
chiddhi maschir'i dutturi,
di truscianti e cavaleri,
di pacchiani e di pasturi...

E ddha pigghia chi ti pigghia
i cunfetti di barcuni
chi parivanu 'na nnigghia
e ghinchivinu 'u stratuni...

E ddhi balli di mavari,
c'a cunocchia e ccu lu fusu,
cu rramaci seculari
si pirdiu puru l'usu...

Tuttu Rriggiu chinu chiunu
di famazzi divirtenti,
cu la panza china 'i vinu
divitivunu la ggenti.

A lu tardu chi allicria !
Nu curteu i bbabbaluci :
carnivali pi la via
a ddacottu si rriduci...

Ora und'esti chiddhu bbeni,
quandu l'anima rririva
e campavi senza peni
pirchì 'u cori non cingiva ?

Quandu veni chiddha sira,
e rricordu 'i tavulati,
st'animeddha mia mi ggrira
pì li cori addulurati...

I filusi su' li guai,
chi spariru di sacchetti,
undi sunnu non lu sai,
ora chi ll'ha' netti netti.

Quattru iorna 'i fantasia,
quattru iorna di sbaffati,
buffunati pi' la via,
ggriri,frischi e li cantati...

Ora nc'è sulu 'a miseria :
fin'ì tutta l'allecria,
e ndi resta comu storia
pi' la nostra picundria...